40 il əvvəl məzun olduqları məktəbdə:Danışan xatirələr

Bölmə: Sosial › ,
Tarix: 11:31 02.02.2024

Kürdəmir rayonu Mərdan Quliyev adına Ərəbxana kənd tam orta məktəbində Birinci Qarabağ müharibəsi şəhidi Mərdan Quliyevin əziz xatirəsinə həsr olunan tədbir keçirilib.

Mərdan Quliyev 26 yanvar 1994-ci ildə Füzuli uğrunda gedən döyüşlərdə qəhrəmancasına şəhid olub. Tədbirdə şəhidimizin müəllimləri və sinif yoldaşları da iştirak edib. Onlar 40 il əvvəl, yəni 1984-ci ildə elə həmin məktəbdən məzun olublar. Tədbirdə məzunlarla yanaşı onlara dərs deyən müəllimlər: ibtidai sinif müəllimi Əlisafa Azayev, riyaziyyat müəllimi Müseyib Şükürov və Mirkərim Mirzəyev,tarix müəllimi Şahin Hacıyev, ingilis dili müəllimi Solmaz Fərəcova, fizika müəllimi Akif İbrahimov çıxış ediblər. Onlar şəhidimizin qısa və şərəfli həyat yolundan, məktəb illərindən danışıblar.

Xatirələrlə dolu həmin günü şəhidimizin sinif yoldaşı Nəcibə Quliyeva belə dilə gətirir:

"Məktəbin həyətinə daxil olan zaman elə hiss etdim ki, ilk dərs gününə gedirəm. Gözümün önündə 40 il əvvəl olan məktəb illəri canlandı.Bizim üçün sinif yoldaşlarımız ilə görüşmək nə qədər xoş olsa da, qəlbimizdə qəm də var idi, çünki artıq aramızda 4 nəfər yox idi"

Nəcibə Quliyeva qeyd edir ki, sinif yoldaşlarımızla bir araya gəlməyi, şəhid sinif yoldaşımızın xatirəsini yad etməyi çoxdan düşünürdük.

Tədbirdən sonra şəhid Mərdan Quliyevin məzarı ziyarət edilib.