Şəhid Muxtar Qasımlının doğum günüdür

Bölmə: Sosial › ,
Tarix: 19:25 23.02.2024

Bu gün şəhid Muxtar Əli oğlu Qasımlının doğum günüdür.

 

O, 23 fevral 1993-cü ildə Bakı şəhərində anadan olub. Azərbaycan Dövlət Bədən Tərbiyəsi və Akademiyasının kikboksinq fakültəsini bitirən Muxtarın erkən yaşlarından idmana marağı olub. Dəfələrlə yarışlarda iştirak edib, mükafatlara layiq görülüb. 27 oktyabr 2019-cu ildə fitnes üzrə Azərbaycan çempionu adına layiq görülən Muxtarın qəlbi vətən eşqi ilə ‘’yanırdı’’. Ailəsinin, dostlarının sevimlisi olan Muxtar subay idi.

 

O, 27 sentyabr 2020-ci ildə başlanan 2-ci Qarabağ müharibəsində Muxtar da vətənin bütövlüyü uğrunda döyüşlərə qoşuldu, qəhrəmancasına vuruşaraq oktyabrın 2-də Füzili döyüşlərində əsgər yoldaşlarını döyüş meydanından çıxararkən şəhid oldu. Muxtar həmin zamanlardan hər kəsin qəlbində dərindən iz qoyub. Hər kəs  onu ‘’tabuta sığmayan şəhidimiz’’ adı verərək yad edir.

 

Azərbaycan ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyev 15 dekabr 2020-ci il fərmanına əsasən Muxtar Qasımlı ölümündən sonra ‘’Vətən uğrunda’’ medalı ilə təltif olundu. 25 dekabr 2020-ci il tarixli sərəncam ilə ‘’Füzulinin azad olunmasına görə’’ medalı ilə təltif edildi.

 

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərib, hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirərək şəhid olan Muxtar Qasımlı 5 noyabr 2020-ci il fərmanı ilə ölümündən sonra 3-cü dərəcəli ‘’Vətənə xidmətə görə’’ ordeni ilə təltif edildi.

 

O, Bakı şəhəri Qala qəbirstanlığından dəfn olunub. Azərbaycan xalqı Muxtar Qasımlı və onun kimi şücaətli, cəsur, qəhrəmancasına şəhid olan oğullarını unutmayacaq.

 

Sevinc Yarməmmədova