Süleyman Ələsgərovun anadan olmasından 100 il ötür

Bölmə: Sosial › ,
Tarix: 20:04 23.02.2024

Bu gün Azərbaycan Respublikasının xalq artisti, tanınmış bəstəkar Süleyman Ələsgərovun anadan olmasından 100 il ötür.

 

Süleyman Əyyub oğlu Ələsgərov 22 fevral 1924-cü ildə Şuşada doğulub. Yaradıcılığında operetta janrı əsas yer tutub. Əsərləri indinin özündə də sevilir. Üzeyir Hacıbəylinin ənənələri Süleyman Ələsgərovun yaradıcılığında özünü aydın şəkildə büruzə verir.

 

Musiqişünas Lalə Hüseynova Süleyman Ələsgərli ilə bağlı fikirlərini "informator.az"la bölüşüb. Onun sözlərinə görə, Süleyman Ələsgərov həm yaradıcılığı, həm də pedaqoji sahəni öz həyatında birləşdirə bilib:

 

"O, həm gözəl mahnılar, həm də tar kamança üçün repertuarlar yazırdı. Onun Azərbaycan musiqisi qarşısında əvəzedilməz xidmətləri olub. Süleyman müəllim hər cəhətdən özündə əsl azərbaycanlı keyfiyyətlərini daşıyırdı. Onun qapıları hamının üzünə açıq idi. Bəstəkarın Şuşada çox gözəl evi olub. O ev sanki ziyarətgah idi. Mədəniyyət xadimlərindən kim Şuşaya gedirdisə, o evdə mütləq qonaq olurdu. O, Şuşasız 75 illik yubileyini belə qeyd etmək istəmədi. İnanıram ki, onun ruhu şaddır. Çünki Şuşamız artıq azaddır".

 

Süleyman Ələsgərov 21 yanvar 2000-ci ildə 75 yaşında dünyasını dəyişib.

 

İlahə Həsənova