Avropanın sülhməramlı oyunu-AÇIQLAMA

Bölmə: Siyasət › ,
Tarix: 22:16 05.04.2025

Avropa ölkələrinin Ukraynaya sülhməramlı qüvvələr göndərməsi məsələsi son aylarda geniş müzakirə olunur. Ukrayna Prezidenti Volodimir Zelenski bildirib ki, Avropa hərbi planlaşdırıcıları Ukraynada xarici qoşun kontingentinin təfərrüatlarını bir ay ərzində hazırlamağı planlaşdırırlar. Lakin NATO-nun bu prosesdə iştirakı üçün bütün üzv ölkələrin razılığı tələb olunur.

Mövzu ilə bağlı siyasi şərhçi Kənan Novruzov “İnformator.az”a açıqlama verib:
“Ukraynada müharibə hazırda yekunlaşmayıb, davam edir. Bu səbəbdən sülhməramlı qüvvə göndərilməsi məsələsini düşünmək hələ ki, tezdir”.

Kənan Novruzovun sözlərinə görə, müharibənin genişmiqyaslı olması da gözləniləndir:
“Atəşkəsin olması müharibənin bitməsi anlamına gəlmir. Müharibə tam bitmədən Avropanın Ukraynaya sülhməramlı kontingent göndərməsi riskli ola bilər”.

K. Novruzov qeyd edir ki, Avropa müharibənin bitməsindən tam şəkildə əmin olmalıdır:
“Digər tərəfdən isə Avropa, ABŞ-dan fərqli olaraq, müharibənin bitməsini istəmir. Çünki Avropa ölkələri düşünür ki, müharibənin bitməsi Rusiyanın xeyrinə ola bilər. Joe Bidenin hakimiyyəti dövründə ABŞ-la Avropa arasında əlaqələr nizamlı olsa da, Donald Trump hakimiyyətdə olarsa, bu münasibətlər dəyişə bilər”.

Şərhçi sonda əlavə edir ki, Avropa yekunda cəbhədə tək qala bilər:
“Avropanın atdığı addımlar bir-biri ilə üst-üstə düşmür. Avropa sülhməramlı kontingenti Ukraynaya göndərmək istəyir, lakin eyni zamanda Ukraynanı müharibə üçün silahlandırır və sülh sazişlərini tam dəstəkləmir. Müharibə bitdikdən sonra Ukrayna zəifləyəcək, müəyyən ərazilər üzrə güzəştə getməyə hazır olacaq və parçalanmağa hazır olan torta çevriləcək. Avropa Ukraynaya sülhməramlı qüvvə göndərməklə, əslində, Ukraynadakı təsir imkanlarını gücləndirməyə çalışacaq”, – deyə o, yekunlaşdırıb.

Aytac Bakıxanova