Təhsildən İşsizliyə: Gənclərin yol ayrıcında qaldığı reallıq...-AÇIQLAMA

Bölmə: İqtisadiyyat › ,
Tarix: 19:59 05.04.2025

Müasir cəmiyyətin qarşısında duran ən mühüm sosial-iqtisadi problemlərdən biri işsizlikdir. Əmək bazarındakı qeyri-sabitlik, iqtisadi tənəzzüllər və texnoloji dəyişikliklər bir çox insanın iş tapmaq imkanlarını məhdudlaşdırır. İşsizlik təkcə fərdlərin maddi rifahına deyil, həm də cəmiyyətin ümumi inkişafına mənfi təsir göstərir. Bu problemə qarşı effektiv həll yollarının tapılması isə dövlət siyasətinin və ictimai təşəbbüslərin əsas prioritetlərindən biri olmalıdır.

İqtisadçı ekspert Natiq Cəfərli "İnformator.az"a deyib ki, hazırda Azərbaycanda gənclərin iş tapmaq problemi təkcə iqtisadi deyil, həm də struktur məsələsidir:

"Universitetlərdə verilən təhsil çox vaxt əmək bazarının tələblərinə uyğun gəlmir. Bu isə tələbələrin məzun olduqdan sonra iş tapmaqda çətinlik çəkməsinə səbəb olur. Digər tərəfdən, regionlarda iş imkanları məhduddur və nəticədə gənclər kütləvi şəkildə paytaxta üz tutur. Bu da Bakıda işsizlik rəqəmlərinin süni şəkildə artmasına gətirib çıxarır. Bizdə təəssüf ki, gənclərin təşəbbüskarlığı dəstəklənmir. Startaplara, innovativ fikirlərə lazımi dəstək və investisiya imkanları yaradılmır. Bu səbəbdən də, istedadlı gənclər xaricə üz tutur, və nəticədə beyin axını baş verir. Hökumət bu məsələyə sistemli yanaşmalıdır — təhsil islahatları, vergi güzəştləri və regionlarda yeni iş yerlərinin yaradılması vacib addımlardır".

Ceyhun Vaqifli