Hörd və Makdonald Adaları-Trampın gömrük rüsumları ilə hədəf aldığı pinqvin və suitilərin yuvası

Bölmə: Dünya › ,
Tarix: 14:30 05.04.2025

Antarktikanın ucqar künclərində yerləşən, pinqvinlər və suitilərin yaşadığı iki kiçik ada – Hörd və Makdonald Adaları – Tramp administrasiyasının yeni gömrük tarifləri ilə hədəf aldığı gözlənilməz məkanlardan biridir.

 

Avstraliyanın cənub-qərbində, təxminən 4000 km uzaqlıqda yerləşən bu adalara yalnız Pörtdən yeddi günlük gəmi səfəri ilə çatmaq mümkündür və demək olar ki, son on ildə bu adalara insan ayağı dəyməyib. Tramp çərşənbə günü genişmiqyaslı idxal vergisi planını açıqlayıb. O, bu vergilərin ABŞ məhsullarına tətbiq olunan ədalətsiz ticarət məhdudiyyətlərinə cavab olduğunu bildirib. Yeni vergilər təkcə bu adaları deyil, bəzi digər Avstraliya torpaqlarını, eləcə də Norveçə məxsus Svalbard arxipelaqını, Folkland adalarını və Britaniya Hind Okeanı ərazilərini də əhatə edir. Avstraliya baş naziri Entoni Albanese cümə axşamı etdiyi açıqlamada “Bu vəziyyət göstərir ki, dünyada təhlükəsiz olan heç bir yer qalmayıb”, deyib.
Bütün Avstraliya kimi, Hörd və Makdonald Adaları, Kokos (Kiling) Adaları və Milad Adası da artıq 10 faiz gömrük tarifinə tabe olacaq. Təxminən 2200 nəfərin yaşadığı Norfolk Adasında isə tarif faizi daha yüksək – 29 faiz olaraq müəyyən edilib.

Minlərlə pinqvinin yaşadığı bir bölgə Hörd Adası buzlarla örtülü, tənha bir yerdir. Avstraliyanın ən böyük və yeganə aktiv vulkanı olan “Big Ben” burada yerləşir və adanın böyük hissəsi buzlaqlarla örtülüdür. Məlumata görə, bu adaya son dəfə 2016-cı ildə Avstraliya hökumətindən icazə almış bir qrup həvəskar radioçu ayaq basıb. Tazmanya Universitetindən Mayk Kofin elmi araşdırmalar məqsədilə bu adaların ətrafındakı sularda yeddi dəfə olub. O, bu adalardan ABŞ-ə ciddi bir ixracatın olduğuna şübhə ilə yanaşır. Lakin bu adalarda bol olan bir şey var – bənzərsiz və heyranedici təbiət. UNESCO-nun Dünya İrsi elan etdiyi adalar, xarici bitkilər, heyvanlar və ya insan müdaxiləsi olmadan inkişaf etmiş nadir bir ekosistem nümunəsi sayılır. Adaların sualtı coğrafiyasını tədqiq edən professor Kofin bildirir: “Pinqvinlər, dəniz filləri və bir çox dəniz quşu növləri bu əraziləri sıx şəkildə koloniyalaşdırıb”.

 

Mənbə: BBC News
Fatimə Heydərova