Moskvada Putin və Pezeşkiyan görüşü

Bölmə: Siyasət › ,
Tarix: 20:32 17.01.2025

Rusiya Prezidenti Vladimir Putin və İran Prezidenti Məsum Pezeşkiyan Kremlin Sarayında bir araya gəliblər. Görüşdə genişmiqyaslı strateji tərəfdaşlıq sazişinin imzalanacağı bildirilib.

İnformator.az xarici KİV-ə istinadən xəbər verir ki, Putin bu sazişin iki ölkə arasında əməkdaşlığa ciddi təkan verəcəyini vurğulayıb: "Uzun müddət üzərində işlədiyimiz bu sənəd ticarət və iqtisadi əlaqələrin inkişafına töhfə verəcək".

İkitərəfli ticarət dövriyyəsinin 2024-cü ilin ilk 10 ayında 15,5 faiz artdığını deyən Putin, həmçinin beynəlxalq və regional məsələlərin də müzakirə olunacağını qeyd edib.

Pezeşkiyan isə Rusiya ilə əlaqələrin hərtərəfli strateji səviyyədə olduğunu bildirərək, "Bu saziş gələcək əməkdaşlıq üçün möhkəm əsas yaradacaq," – deyə vurğulayıb.

O, səfərdən öncə bəzi razılaşmaların nəzərdən keçirildiyini və mövcud gecikmələrin aradan qaldırılmağa çalışıldığını bildirib. Pezeşkiyan bölgədə problemlərin yalnız regional əməkdaşlıq çərçivəsində həll edilə biləcəyini əlavə edib və xarici müdaxilələrin vəziyyəti gərginləşdirdiyini bildirib.

Elnurə Kərimova