Cənubi Koreyanın Prezidenti Yoon Suk Yeol Qiyamla İttiham Olunaraq Məhkəməyə Çıxıb

Bölmə: Dünya › ,
Tarix: 20:48 20.02.2025

Cənubi Koreyanın impiç edilən prezidenti Yoon Suk Yeol cümə axşamı Seul məhkəməsində ölkənin vəzifədə olan liderinə qarşı ilk cinayət ittihamı olan qiyamla bağlı ilk məhkəmə iclasına çıxıb.

 

Keçən ay prokurorlar Yoonu dekabrın 3-də hərbi vəziyyət elan etməsi ilə qiyama rəhbərlik etməkdə ittiham edərək ona qarşı ittiham irəli sürüblər.

Ədliyyə Nazirliyinin korteji Yoonun saxlanıldığı Seul Təcridxanasından onu məhkəməyə aparıb. Məhkəmənin qarşısında təhlükəsizliyi təmin etmək üçün polis avtobusları düzülüb.

Prokurorlar məsələnin ciddiliyini nəzərə alaraq sürətli məhkəmə prosesinin keçirilməsini tələb etdilər, lakin Yoonun vəkilləri iş materiallarını nəzərdən keçirmək üçün daha çox vaxta ehtiyac duyduqlarını bildiriblər.

 

Vəkillərdən biri məhkəməyə Yoonun "ölkəni iflic etmək niyyətində olmadığını" söyləyib və hərbi vəziyyət elan etməsinin məqsədinin "böyük müxalifət partiyasının qanunvericilik diktaturasını" xalqa çatdırmaq olduğunu qeyd edib.

 

Əgər Yoon təqsirli bilinərsə, o, siyasi və parlament fəaliyyətini qadağan edən, medianı nəzarət altına almağa çalışan hərbi vəziyyət qərarına görə illərlə həbs cəzası ala bilər.

 

Bu addım Asiyanın dördüncü ən böyük iqtisadiyyatına və ABŞ-nin əsas müttəfiqlərindən birinə çevrilən ölkədə siyasi çaxnaşmaya səbəb olub. Baş nazir də impiç edilərək vəzifəsindən uzaqlaşdırıldı, bəzi yüksək rütbəli hərbi rəsmilər isə hadisədə iştirak etdiklərinə görə ittiham olunub.

 

Məhkəmə həmçinin Yoonun vəkillərinin onun həbs qərarının ləğv edilməsi ilə bağlı müraciətini dinləyib. Vəkillər araşdırmanın qeyri-qanuni aparıldığını və Yoonun sübutları məhv etmək riski olmadığını iddia ediblər.

 

Məhkəmənin həbs qərarı ilə bağlı nə vaxt qərar verəcəyi məlum deyil, lakin hakim cinayət işinin növbəti iclasının martın 24-də keçiriləcəyini elan edib.

 

Cinayət işindən sonra Yoon eyni gündə Konstitusiya Məhkəməsində davam edən impiçment məhkəməsinə də qatılıb.Məhkəmə prosesi son mərhələsinə çatıb.

 

Məhkəmədə şahid qismində dindirilməyə impiç edilərək taleyi ilə bağlı məhkəmə qərarını gözləyən baş nazir Han Duk-su da daxil idi.

 

"Ola bilsin ki, fövqəladə hərbi vəziyyət elan edilməzdən əvvəl, zamanı və sonra baş verən bu həddindən artıq siyasət səbəbindən xalqımızın hər birinin hiss etdiyi ümidsizlik məni dərin narahat edir", - deyə Han bildirib.

 

CNN

Nuray Qurbanlı