Havanın kəskin dəyişməsinin ölkədaxili turlara təsiri-AÇIQLAMA

Bölmə: Sosial › ,
Tarix: 22:39 03.07.2024

Bölgələlərdə havanın kəskin dəyişməsi ölkədaxili turlara ciddi təsir göstərib. Deyilənə görə, leysan yağışlar səbəbindən çox sayda tur şirkəti səfərləri təxirə salmalı olub. Əslində son bir neçə gündür ki, hava isinib. Amma yenə də insanlar rayonlara üz tutmaqda tərəddüd edirlər.

 

İyun ayı ərzində Gəncə-Qazax, Qarabağ və Şərqi Zəngəzur, Balakən-Şəki, Quba-Qusar, Lənkəran-Astara və digə bölgələrdə mütəmadi olaraq hava kəskin dəyişdi. Bu isə ölkədaxili turların sayında xeyli azalmaya səbəb olub. Tur şirkətləri hava şəraitini nəzərə alaraq çox sayda səfərləri təxirə salıb.

 

Ekspertlərin sözlərinə görə, yaranan təhlükəli vəziyyət rayonlara səfər etmək istəyənlərin gözünü qorxudub. Son günlər hər nə qədər qiymətlərdə endirimlər edilsə də, həm yerli həm də xarici turistlər rayonlara səfər etmək istəmirlər. Bu hal isə ölkədaxili turizm sahəsinə mənfi təsir göstərir.

 

Turizm məsələləri üzrə ekspert Rəhman Quliyev bildirib ki, regionlara yağan intensiv yağışlar həm otellərin fəaliyyətində, eyni zamanda rayonlara gedən turistlərin gedişində müəyyən çətinliklər yaratdı:

 

"Keçən ilki bu vaxtı nəzərə alsaq, yəni bu il həmin dövr ərzində paytaxtdan regionlara səfər edən turistlərin sayında daşqınlarla əlaqəli olaraq 20-25% yəni turist kütləsinin aşağı düşməsinin şahidi oluruq. Paytaxtda havaların sərin keçməsi də təxminən 30% turistlərin paytaxtda qalmasına daha çox üstünlük verirlər".

 

Görünən odur ki, ölkədaxili turizm sahəsində hələ bir müddət də durğunluq müşahidə ediləcək. Çünki qarşıdakı günlərdə rayonlarda havanın qeyri sabit keçəcəyi gözlənilir. Sinoptiklərin məlumatına görə bəzi dağlıq ərazilərdə yağış yağacağı, şimşək çaxacağı, dolu düşəcəyi ehtimalı var.