İsraildə Qəzza zolağından hücumlar nəticəsində ölənlərin sayı 300-ə çatıb

Bölmə: Siyasət › ,
Tarix: 11:01 08.10.2023

İsrailin Qəzza zolağına hücumları gecə boyu davam edib.

İnformator.az xarici mediaya istinadən xəbər verir ki, “HƏMAS”ın silahlı dəstəsi dünən səhər saatlarında İsrailə qarşı “Əqsa tufanı” əməliyyatına başladıqdan sonra İsrail Qəzza zolağına doğru hücuma keçərək “Dəmir Qılınclar” əməliyyatına başladığını açıqlayıb.

İsrail ordusu müharibə vəziyyətinə düşdüklərini açıqlayıb və Qəzzada bir çox bölgə bombalanıb.

İsrailin Baş naziri Benyamin Netanyahu Qəzzadakı mülki insanları ərazini tərk etməyə çağırıb.

Fələstin prezidenti Mahmud Abbas fələstinlilərə təzyiq və beynəlxalq sükutun gərginliyə səbəb olduğunu bildirib.

Digər tərəfdən, Livandakı Hizbullah Hərəkatı İsrail sərhədindəki hərbi məntəqələrə hücumun məsuliyyətini öz üzərinə götürdüklərini açıqlayıb.

İsrail mətbuatının verdiyi məlumata görə, ölkədə 300 nəfər həyatını itirib, Fələstin Səhiyyə Nazirliyi isə 265 fələstinlinin həyatını itirdiyini açıqlayıb.

Nəzrin Cəbiyeva