İlham Əliyevin hakimiyyəti illərində Azərbaycan tarixi ərazisi olan Qarabağı işğaldan azad edib-Rossiyskaya qazeta

Bölmə: Siyasət › ,
Tarix: 16:34 15.10.2023

"İlham Əliyevin hakimiyyəti illərində Azərbaycan tarixi ərazisi olan Qarabağı işğaldan azad edib. Məhz İlham Əliyevin hakimiyyəti illərində ölkə əsas maraqlarının perimetri boyu riskləri minimuma endirməyə nail olub".

 

APA-nın Moskva müxbiri xəbər verir ki, bu barədə “Rossiyskaya qazeta” dərc olunan “Son 20 ildə İlham Əliyevin rəhbərliyi ilə Azərbaycan regionda nüfuzunu xeyli gücləndirib” adlı məqalədə qeyd olunub.

 

Məqalədə bildirilib ki, İlham Əliyevin hakimiyyəti daxili siyasi sabitliyin simvolu olmaqla yanaşı, həm də ölkənin beynəlxalq nüfuzunu keyfiyyətcə necə gücləndirməyin nümunəsinə çevrilib.

 

“Prezidentin nailiyyətləri sırasında xarici KİV və analitiklər, bir qayda olaraq, milli səviyyədə sabitliyin və təhlükəsizliyin qorunub saxlanması və möhkəmləndirilməsini, milli iqtisadiyyatın keyfiyyətcə yüksəlişini xüsusi qeyd edirlər. Əlbəttə ki, ilk uğurlar silsiləsi Azərbaycana həvalə edilmiş beynəlxalq arenada ixrac rolu olmadan özünü göstərə bilməzdi. Məsələn, Əliyevin rəhbərlik etdiyi illərdə Bakı irimiqyaslı neft-qaz təşəbbüslərini həyata keçirməyə nail olub. Belə ki, Bakı - Tbilisi - Ceyhan, Bakı - Tbilisi - Ərzurum xətti (Cənubi Qafqaz Boru Kəməri) əsas ixrac boru kəmərləri istifadəyə verilib.

 

Dünya Bankının araşdırmasına görə, 2003-cü ildən 2020-ci ilə qədər təbii ehtiyatların ixracının artması hesabına ölkənin ÜDM-nin orta artımı təqribən 8%-ə çatıb (maksimum 2006-cı ildə qeydə alınıb - 34,5%).

 

Ancaq bir faktı da unutmaq olmaz ki, Əliyevin dövründə milli iqtisadiyyatın diversifikasiyasına və ixracdan asılılığın azaldılmasına birmənalı önəm verilib, çünki indiki rəhbər vətəndaşların rifahını özünün prioriteti hesab edib və yalnız balanslaşdırılmış iqtisadi kanallar belə rifahın möhkəm təminatı ola bilər.

 

Daxili inkişafda sıçrayışlar demoqrafik göstəricilərdə aydın şəkildə əksini tapmaya bilməzdi. Belə ki, Dünya Bankının qeyd etdiyi kimi, Azərbaycanda əhalinin sayı bir neçə milyon nəfər artıb. Eyni zamanda, 2003-2020-ci illər ərzində adambaşına düşən ÜDM 4,8 dəfə artaraq 884 dollardan 4222 dollara yüksəlib. Respublika hakimiyyəti 1,4 milyondan çox sabit iş yerinin yaradılmasına nail olub.

 

Dövlətin iqtisadi dayanıqlığına müvafiq vurğu həm də Azərbaycanın beynəlxalq münasibətlərdə strategiyasının müəyyənedici xüsusiyyətinə çevrilir. Bakı investisiyaların qarşılıqlı fəaliyyəti üçün geniş imkanlar yaratmaq məqsədilə ilkin mərhələdə münaqişələrin azaldılmasına və böhranların qarşısının alınmasına diqqət yetirib.

 

Əliyevin hakimiyyəti illərində ölkə əsas maraqlarının perimetri boyu riskləri minimuma endirməyə nail olub. Belə ki, Bakı inandırıcı şəkildə və özü üçün minimal itkilərlə onilliklər ərzində Azərbaycanda gündəmin əsas bəndlərindən biri olan tarixi ərazisi olan Qarabağ regionuna nəzarəti qaytara bilib. Hazırkı prezidentin rəhbərliyi altında respublika yerli erməni əhalisinin maraqlarını hərtərəfli nəzərə alaraq total reinteqrasiya üçün məkan açaraq faktiki olaraq bir vaxtlar işğal olunmuş region ətrafında hərbi və diplomatik dalanı sındırmışdır.

 

Azərbaycanın diplomatiyaya sadiqliyi onunla maraqların toqquşduğu Ermənistan üçün cəlbedici davranış modeli olub. İki regional qonşu arasında sülh müqaviləsinin bağlanacağı göz qabağındadır. Bu kurs Bakının terror təhlükəsini zərərsizləşdirmək üzrə fəaliyyəti ilə formalaşan regionda yeni vəziyyətlə diktə olunur”, - deyə məqalədə qeyd edilib.

 

O da vurğulanıb ki, İlham Əliyevin ictimai etimad reytinqinin davamlı olaraq ən yüksək səviyyədə qalması təəccüblü deyil. “Səbəb odur ki, iyirmi il ərzində dövlətin başında olan indiki prezident bütün seçki vədlərini praktiki olaraq yerinə yetirib: tammiqyaslı regional layihələr həyata keçirilib, dövlətin gəlirləri artır, yeni iş yerləri açılır, sosial problemlər sürətlə həll olunur. İndi isə Azərbaycan regionda yeni tendensiyaları müəyyən edən faktiki və qeyd-şərtsiz liderə çevrilib”, - deyə Rusiyanın dövlət mətbuat orqanında dərc olunan məqalədə bildirilib.