Türk Dövlətləri Təşkilatı (TDT) ölkələrinin ortaq himni hazırlanacaq

Bölmə: Siyasət › ,
Tarix: 16:02 18.11.2024

Layihəyə rəhbərlik edənlərdən biri professor Erhan Özden bildirib ki, marş artıq yaxın gələcəkdə hazırlana bilər.

 

Ortaq türk himninin yaradılması türk xalqları üçün nəyi ifadə edəcək? 

 

Mövzu barəsində politoloq Elmir Səftərov ‘’informator.az"a açıqlamasında bildirib ki, Azərbaycanın əldə etdiyi tarixi zəfərdən sonra, ölkəmizin Türk dövlətləri ilə əlaqələri ictimai-siyasi həyatın bütün sahələrində intensiv şəkildə inkişaf edir:

 

‘’Bu intensivlik digər Türk dövlətlərinin bir-biri ilə tarixdən gələn bağlılıqlarını, qarşılıqlı faydalı əməkdaşlığını dərinləşdirir. Bu yaxınlaşma, həmçinin bütün sahələrdə türk xalqlarının bir-birinə yaxınlaşmasına da təkan verir. 

İstər Türk dövlətlərinin 34 hərfdən ibarət vahid əlifbası yaradılması üzrə irəliləyişlərin əldə edilməsi, istərsə ortaq pul vahidinin, istərsə də ortaq himnin hazırlanması ideaları hazırkı mürəkkəb geosiyasi reallıqlar müstəvisində vacib əhəmiyyət daşıyır’’.

 

Elmir Səftərov qeyd edib ki, atılacaq bu addımların hər biri, gələcək perspektivlər baxımından həyatı önəmə sahibdir:

 

‘’Atılan bütün addımlar TDT-yə üzv ölkələr arasında təmasları daha da sıxlaşdırır, əlaqələri gücləndirməyə xidmət edir. Bu da tarixi qardaşlıq münasibətlərini daha da möhkəmləndirir. Dünyadaki təhdidlər fonunda birgə koordinasiyanı artırır. Eyni zamanda, Türk dövlətlərinin daha da yaxınlaşması bölgədəki ölkələrin davamlı inkişafına, sülhə təkan verir’’.

 

Sevinc Yarməmmədova