“LİDER TV” 23- Tarixə qovuşan MƏKTƏB
Bölmə: MEDİA ›
,
Tarix: 17:16 01.09.2023
23 il əvvəl bu gün “Lider TV” Azərbaycan teleməkanına daxil oldu. 1 iyun 2021-ci ildə isə “Lider TV”nin fəaliyyəti dayandırıldı. Bu kanal fəaliyyətini dayandırsa da, keçmiş liderçilər “Lider TV”ni unutmur və daim xatırlayırlar.
"İnformator.az"a müsahibə verən Lider TV-nin keçmiş xəbərlər departamentinin prodüser və redaktoru Elnarə Dərziyeva Liderin bir tarix olduğunu və tarixlərin unudulmadığını deyir: "Lider TV-də mənim bir çox xatirələrim var. Lider TV-nin 1 yaşı olanda , məhz bu gün - 1 sentyabr mən orada işə başlamışdım. O vaxt mənim 21 yaşım var idi. İlk vaxtlar müxbirlər sınaq müddətinə götürülürdü və daha sonra işə qəbul edildim. 18 il Lider TV-də işləmişəm. Bütün uğurlarıma görə, məhz bu televiziyaya borcluyam”.
“Lider TV”də gözəl dostlar qazandığını bildirən Elnarə Dərziyeva oranın bir məktəb kimi tarixə qovuşduğunu vurğulayır. “Mənə televiziya jurnalistikasını “Lider TV” öyrədib. Baxmayaraq ki, mən Bakı Dövlət Universitetinin Teleradio jurnalistikası ixtisası üzrə təhsil almışam, amma yenə də mən bir çox şeyi həmin o sınaq müddətində öyrənmişəm. Lider Televiziyasına və onun dəyərli kollektivinə sonsuz minnətdaram".
NİGAR XƏLİLZADƏ
