Qazaxıstanda Zəfər Günü münasibətilə möhtəşəm tədbir keçirildi-FOTO

Bölmə: Siyasət › ,
Tarix: 20:45 09.11.2023

8 noyabr 2023-cü il tarixində Qazaxıstan Respublikasının Almatı şəhərində Azərbaycan Respublikasında Zəfər Günü münasibətilə tədbir keçirilib.

Tədbirdə AR-ın Qazaxıstan Respublikasındakı Səfiri Ağalar Atamoğlanov, QR XİN-in Almatı şəhərindəki nümayəndəliyinin rəhbəri, Almatı şəhərində yerləşən diplomatik korpusun, Qazaxıstanda yaşaya Azərbaycanlılar və Qazaxıstanın ictimai xadimləri iştirak edib.

Tədbiri giriş sözü ilə açan səfir A.Atamoğlanov şanlı Zəfər bayramı haqqında qonaqlara ətraflı məlumat verərək, 8 noyabr-Zəfər Gününün Azərbaycan xalqının iradəsinin və gücünün təntənəsinə çevrildiyini qeyd edib. 2020-ci ilin sentyabr ayında Ermənistanın növbəti təxribatına cavab olaraq, Azərbaycanın özünü müdafiə hüququndan istifadə edərək və beynəlxalq hüquqa tam uyğun olaraq həyata keçirilən cavab tədbirlərindən bəhs edib.

44 Günlük Vətən müharibəsi nəticəsində Ali Baş Komandan İlham Əliyevin rəhbərliyi ilə ölkəmizin ərazi bütövlüyünü təmin etdiyi, münaqişənin tarixdə qaldığını bildirib. Qanunsuz erməni qüvvələrinin mövcudluğuna son qoymaq və bütün ərazilərində tam suverenliyi bərpa etmək məqsədilə, Azərbaycanın Qarabağ bölgəsində 19-20 sentyabr 2023-cü il tarixlərində 24 saat ərzində həyata keçirdiyi anti-terror tədbirləri haqqında məlumat verib.

3 noyabr 2023-cü il tarixində Astanada keçirilən Türk Dövlətləri Təşkilatının yubiley Zirvə Görüşündə çıxışı zamanı QR Prezidenti K,J.Tokayevin ölkəmizin ərazi bütövlüyünün bərpa etməsi ilə bağlı təbrik etdiyini vurğulayıb. Hazırda işğaldan azad edilən ərazilərdə həyata keçirilən geniş miqyaslı quruculuq və bərpa işləri haqqında tədbir iştirakçılarına ətraflı məlumat verib.

Son iki il ərzində QR Parlamenti və KİV nümayəndələrinin, ictimai xadimlərin işğaldan azad edilən ərazilərə səfəri, Qazaxıstanlı jurnalist N.Kumarqızının Qarabağ şəhidi haqqında yazdığı kitabın təqdimatından, Astana və Türküstan şəhərlərində keçirilən “Şuşa Günləri”ndən, həmçinin strateji tərəfdaşlıq və müttəfiqlik səviyyəsində olan Azərbaycan-Qazaxıstan münasibətlərindən söhbət açıb.

Səfir çıxışının sonunda tədbirin təşkilatçılığında dəstək verdiyinə görə Azərbaycanlı iş adamı Yusifov Amil Turab oğluna dərin təşəkkürünü bildirib. Daha sonra QR XİN-in Almatı şəhərində nümayəndəliyinin rəhbəri Bakıtjan Buleqenov çıxış edərək, Dövlət Bayrağı Günü və ölkəmizin ərazi bütövlüyünün bərpa olunması münasibətilə təbriklərini çatdırıb.

Ərazi bütövlüyünün bərpasının beynəlxalq hüquq normalarına və BMT-nin müvafiq sənədlərinə tam uyğun olduğunu və Azərbaycan xalqının ədalətli və tarixi əhəmiyyətli nailiyyət olduğunu qeyd edib. Qazaxıstanın Azərbaycanla əlaqələrin inkişafına böyük əhəmiyyət verdiyini diqqətə çatdıraraq, siyasi, iqtisadi, mədəni və humanitar sahələrdə əlaqələrin inkişafından bəhs edib.

Həcər Əmiraslanlı