"ARB 24 NewsLab" təlim proqramı başlayıb

Bölmə: MEDİA › ,
Tarix: 22:06 04.04.2023

Bakı Dövlət Universiteti və ARB 24 telekanalı arasında imzalanmış əməkdaşlıq müqaviləsi çərçivəsində "ARB 24 News Lab" təlim proqramı başlayıb.

 

İNFORMATOR.AZ xəbər verir ki, praktiki təlimlərə cəlb edilən 10 tələbə ilə görüş keçirilib. Görüşdə telekanalın direktoru Radik İsmayılov, kanalın Departament rəhbərləri Elnur Şibliyev, Çinarə Nurmməmmədova, xidmət rəhbəri Orxan Quliyev, BDU-nun Jurnalistika fakültəsinin dekanı Vüqar Zifəroğlu, həmçinin kafedra müdirləri professor Cahangir Məmmədli, dosentlər Aynur Nəsirova və Xatirə Hüseynova iştirak ediblər.

 

Seçilən tələbələr arasında Bakı Dövlət Universiteti Jurnalistika fakültəsinin dördüncü kurs tələbəsi Aygün Mustafayeva bu təlim proqramının gələcək karyerasında böyük rol oynayacağını söyləyib:

 

"ARB News Lab" proqramı ötən il də keçirilib. Mənim tanıdığım yoldaşlarım arasından hazırda təlim vasitəsi ilə seçilən və telekanalda fəaliyyət göstərən şəxslər var. Mən də onlardan stimul alaraq, bu təlim proqramına qatılmağı nəzərdə tuturdum. Artıq dördüncü kurs olduğuma görə müraciət edə bildim. Ümid edirəm ki, bu təlim proqramını uğurla başa vura biləcəyik və reportyorluq sahəsinin incəliklərini öyrənəcəyik. Karyeramızın ilkin addımlarında "ARB 24 NewsLab" təlim proqramı bizə yeni töhfə verəcək".

 

Jurnalistika fakültəsinin dördüncü kurs tələbəsi Çimnaz Qəzənfərli isə bu proqramın qazandıracağı təcrübələrin vacibliyini vurğulayıb:

 

"ARB 24 NewsLab" təlim proqramına seçildiyimə görə çox sevinirəm, özümü şanslı hesab edirəm. Jurnalistika fakültəsinin tələbəsi kimi bu cür təlimlərin mənə qazandıracağı təcrübələrin fərqindəyəm. Əvvəlcə müsahibə mərhələsini uğurla keçdim və yaxın günlərdə də təlimlərimiz baş tutacaq. Bu müddətdə jurnalistikanın müxtəlif sahələrinə aid bacarıqlara sahib olacayıq. İnanıram ki, təlimdə iştirak edən hər bir tələbə üçün təlim uğurlu olar".

 

Qeyd edək ki, tələbələr 3 ay  ərzində keçiriləcək "ARB 24 NewsLab" təlim proqramında xəbər hazırlanması, nitq mədəniyyəti, görüntü, videomontaj sahələrinə yiyələnəcəklər. Tədris proqramını uğurla başa vuran iştirakçılara sertifikat veriləcək. Onların bir qismi "ARB 24"də işlə təmin olunacaq.

 

Xatırladaq ki, bu praktiki təlimlər Bakı Dövlət Universiteti və ARB 24 telekanalı arasında imzalanmış əməkdaşlıq müqaviləsi çərçivəsində reallaşan ikinci təlim proqramıdır. Birinci təlim proqramını uğurla başa vuran 5 namizəd 2022-ci il oktyabrından rəsmi şəkildə işə götürülüb. Hazırda onlar ARB 24-də fəaliyyətlərini davam etdirirlər.